Անչափահաս աղջիկ երեխային բռնության ենթարկած մայրը ձերբակալվել է․ ՔԿ

Անչափահաս աղջիկ երեխային բռնության ենթարկած մայրը ձերբակալվել է։ 

Այս մասին հայտնում են ՔԿ-ից։

Այդ թվում՝ ՀՀ քննչական կոմիտեում քրեական վարույթ է նախաձեռնվել անչափահաս երեխայի նկատմամբ բռնություն և սեռական ոտնձգություն կատարելու վերաբերյալ համացանցում տարածված տեսանյութի կապակցությամբ։

«Անչափահաս երեխայի նկատմամբ բռնություն և սեռական ոտնձգություն կատարելու վերաբերյալ համացանցում տարածված տեսանյութի կապակցությամբ, Ոստիկանությունից ստացված հաղորդման առթիվ, 2023թ օգոստոսի 18-ին ՀՀ Քննչական կոմիտեի Գեղարքունիքի մարզային քննչական վարչությունում նախաձեռնվել է քրեական վարույթ ՀՀ քրեական օրենսգրքի 196-րդ հոդվածի՝ (անձին ֆիզիկական ուժեղ ցավ կամ հոգեկան ուժեղ տառապանք պատճառելը) 2-րդ մասի 3-րդ` անչափահասի նկատմամբ, 4-րդ՝ առանձին դաժանությամբ, և 6-րդ կետերը՝ հանցավորից նյութական կամ այլ կախվածության մեջ գտնվողի նկատմամբ։ 198-րդ հոդվածի (սեքսուալ բնույթի բռնի գործողություններ) 3-րդ մասի 1-ին՝ կատարվել է 18 տարին չլրացած անձի նկատմամբ վերընթաց ազգականի կամ այն անձի կողմից, և 2-րդ կետերի՝ կատարվել է 12-ից 14 տարին չլրացած անձի նկատմամբ, 239-րդ հոդվածի՝ (երեխային պոռնկության կամ պոռնկագրական բնույթի նյութեր կամ առարկաներ պատրաստելու կամ տարածելու հետ կապված գործողություններ կատարելուն հակելը կամ ներգրավելը) 2-րդ մասի 1-ին՝ այն անձի կողմից, որի վրա դրված է երեխայի դաստիարակությունը, և 2-րդ կետերի՝ տեղեկատվական կամ հաղորդակցական տեխնոլոգիաներն օգտագործելով՝ պատժվում է ազատազրկմամբ` չորսից ութ տարի ժամկետով և 300-րդ հոդվածի՝ (պոռնկագրական նյութեր կամ առարկաներ պատրաստելը, տարածելը կամ պահպանելը) 3րդ մասի 1-ին՝ կատարվել է մերձավոր ազգականի կամ այն անձի կողմից, որի վրա դրված է եղել երեխայի դաստիարակությունը, և 2-րդ կետերի զուգորդվել է անչափահասի նկատմամբ դաժան վերաբերմունքի հատկանիշներով։ Կինը՝ Ա․Ա․-ն հանցագործություն կատարելու մեջ անմիջականորեն ծագած հիմնավոր կասկածի հիմքով ձերբակալվել է։

Նախաքննությունը շարունակվում է, ձեռնարկվում են բոլոր անհրաժեշտ միջոցները կատարվածի հանգամանքները ամբողջությամբ պարզելու և երեխաների իրավունքների պաշտպանությունն ապահովվելու նպատակով։ ՀՀ քննչական կոմիտեն առաջիկայում ավելի համապարփակ տեղեկատվություն կհրապարակի»։

Հիշեցնենք՝ ավելի վաղ համացանցում տարածվել էր տեսանյութ, որտեղ կինը ֆիզիկական բռնության է ենթարկում անչափահաս աղջիկ երեխայի, հարվածում նրան, ցուցաբերում ստորացուցիչ, նվաստացնող վերաբերմունք՝ մերկացնելով նրան ու թքելով երեխայի վրա: Կինը նաև բռնության տեսարանին է ներգրավել 2 անչափահաս այլ աղջիկ երեխաների (ենթադրաբար՝ բռնության ենթարկված երեխայի քույրերին): Մոր դրդմամբ ու հորդորով աղջիկները թքում և միզում են մյուս երեխայի վրա:

Այս ամենը կինն անում է միացված տեսախցիկի առաջ՝ պարբերաբար ուղղելով այն և աղջիկներին հորդորելով շարժվել ու գործել այնպես, որ ամեն ինչ կադրում հստակ երևա:

Համացանցում տարածված և մեծ աղմուկ բարձրացրած այդ տեսանյութում պատկերված կինը արագորեն հայտնբերվեց ՆԳՆ ոստիկանության Հասարակական անվտանգության ապահովման գլխավոր վարչության, Գավառի և Կենտրոնական բաժինների ոստիկանների համատեղ ձեռնարկած միջոցառումների արդյունքում։

Ի հայտ եկած այլ մանրամասների համաձայն՝ ընտանիքի հայրը դատապարտված է՝ երեխաների նկատմամբ սեռական բռնություն կատարելու համար: Ընտանիքը Գավառ է տեղափոխվել երկու-երեք տարի առաջ: Ամուսինը Իջևանի բնակիչ է, իսկ կինը՝ Շամշադինի: 

ՀՀ ՆԳՆ ոստիկանությունը տեսանյութ է հրապարակել անչափահաս աղջիկ երեխային բռնության ենթարկող մորը բերման ենթարկելուց՝ նշելով, որ զարհուրելի արարքը տեղի է ունեցել Գավառում: