Ստեփանակերտի խաղաղապահ առաքելության կենտրոն անհետ կորածների մասին 214 դիմում է ստացվել
Ամբողջ շաբաթվա ընթացքում Ստեփանակերտի խաղաղապահ առաքելության կենտրոնի թեժ գծում ստացվել է ավելի քան 210 դիմում՝ անհետ կորած հայ զինծառայողների վերաբերյալ: Այս մասին հայտնում է ՌԴ ՊՆ մամուլի ծառայությունը:
«Թեժ գծի աշխատանքի ընթացքում՝ նոյեմբերի 30-ից դեկտեմբերի 4-ը, 214 դիմում է ստացվել անհետ կորած հայ զինծառայողների վերաբերյալ»- ասված է հաղորդագրության մեջ:
Մասնագետները ստուգել, մշակել եւ 186 զինծառայողի վերաբերյալ տվյալները փոխանցել են խաղաղապահ առաքելության կենտրոնի որոնողական խմբերին: Բացի այդ, 45 քաղաքացիների հեռախոսով տրամադրվել է հոգեբանական օգնություն, իսկ անհետ կորածների որոնման աշխատանքներում ցուցաբերված օգնության համար 9 շնորհակալական պատասխան է ստացվել:
ՌԴ ՊՆ-ից նշել են, որ մինչ օրս կենտրոն է դիմել 1900 քաղաքացի՝ իրենց անհետ կորած ազգականների որոնման, սեփականության վերադարձի եւ այլ հարցերով:
ՌԴ արտակարգ իրավիճակների նախարարության լրատվական ծառայությունն էլ հայտնում է, որ հատուկ ինքնաթիռով փրկարարների հերթական խումբն է ուղարկել Լեռնային Ղարաբաղ, նրանց թվում են կինոլոգներ, լեռնային փրկարարներ, կապավորներ եւ հոգեբաններ:
«Դեկտեմբերի 6-ին Մոսկվայից թռիչք է կատարել ԱԻՆ Ил-76 հատուկ ինքնաթիռը: Բացի մասնագետներից, խումբը բաղկացած է Լիդեր կենտրոնի պիրոտեխնիկներից եւ լեռնափրկարարներից, Նոգինսկի փրկարարական կենտրոնի մասնագետներից, ինչպես նաեւ հոգեբաններից: Մեկնող անձնակազմը կորոնավիրուսի թեստավորում է անցել»,-ասված է հաղորդագրության մեջ:
Ինքնաթիռը կտեղափոխի նաեւ 3 ուղեւորատար ավտոբուս, անհրաժեշտ տեխնիկա ու սարքավորումներ:
Կարծիքներ