Մեծ Բրիտանիան որոշել է սառեցնել ռազմավարական երկխոսությունը Վրաստանի հետ

10 տարվա ընթացքում առաջին անգամ Մեծ Բրիտանիան որոշել է սառեցնել ռազմավարական Wardrop երկխոսությունը, որն ամեն տարի թագավորությունն իրականացնում էր Վրաստանի հետ նախարարների մակարդակով։

Այս մասին հայտնել է Վրաստանում Մեծ Բրիտանիայի դեսպան Գարեթ Ուորդը։

«Մենք հիասթափվեցինք, երբ «Վրացական երազանքի» առաջնորդները սկսեցին առաջ տանել դավադրության տեսությունները և ենթադրություններ անել, որ արևմտյան գործընկերները խարխլում են Վրաստանը։ Մենք ցնցվեցինք, երբ «Վրացական երազանքը» նախընտրական պայքարի շրջանակում խոստացավ արգելել ընդդիմադիր կուսակցությունների գործունեությունը»,- ասել է  դեսպանը:

Բացի դրանից՝ բրիտանական կողմը չեղարկել է նաև պաշտպանական ոլորտում նախատեսվող բարձր մակարդակի բանակցությունները և կասեցրել է կիբեռանվտանգության ծրագիրը։

Միաժամանակ Գարեթ Ուորդը հույս է հայտնել, որ հոկտեմբերի 26-ին Վրաստանում կայանալիք խորհրդարանի ընտրությունից հետո երկրի կառավարությունը կվերադառնա արևմտամետ քաղաքականության, և Լոնդոնի ու Թբիլիսիի միջև վստահությունը կվերականգնվի։

«Ընտրություններից հետո, անկախ նրանից, թե ով է կառավարությունում, մենք հույս ունենք տեսնել եվրաատլանտյան ուղի վերադարձի հստակ ապացույցներ»,- հույս է հայտնել դեսպանը։