Դիպուկահարի կրակոցից տղամարդու մահվան դեպքի առիթով քրեական գործ է հարուցվել

Արցախի քննչական կոմիտեից տեղեկացնում են, որ ԱՀ ՔԿ տարածքային քննչական վարչությունում վարույթ է ընդունվել 2021թ. հոկտեմբերի 9-ին՝ ժամը 12:20-ի սահմաններում, ԱՀ Մարտակերտ քաղաքի 1966թ. ծնված բնակիչ Արամ Ալեքսեյի Տեփնանցի կողմից վարվող տրակտորով աշխատանքներ կատարելու ժամանակ, հակառակորդի կողմից ԱՀ Մարտակերտի շրջանի վարչական տարածքի ուղղությամբ ազգային ատելության շարժառիթով, ապօրինաբար մեկ ուրիշին դիտավորությամբ կյանքից զրկելու՝ սպանելու նպատակով կրակոցներ արձակելու հետևանքով Ա. Տեփնանցին հրազենային գնդակային մահացու վիրավորում պատճառելու դեպքի առթիվ ԱՀ քրեական օրենսգրքի 103-րդ հոդվածի 2-րդ մասի 14-րդ կետով հարուցված քրեական գործը:
Դեպքի վայր է մեկնել ԱՀ քննչական կոմիտեի տարածքային քննչական վարչության ավագ քննիչը:

Քրեական գործի շրջանակներում իրականացվում են համապատասխան դատավարական և քննչական գործողություններ:
Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ԱՀ քրեական դատավարության օրենսգրքով նախատեսված կարգով, դատարանի` օրինական ուժի մեջ մտած դատավճռով: